ҚР Оқу-ағарту министрлігінің «Өрлеу» біліктілікті арттыру ұлттық орталығы «Келешек мектептері» жобасы аясында педагогтердің кәсіби құзыреттілігін дамытуға бағытталған кешенді бағдарламаны іске асыруды жалғастыруда, деп хабарлайды F16.kz.
Оқу-ағарту министрлігі таратқан ақпаратқа сенсек, жыл соңына дейін Қазақстанда 3 мыңнан астам педагог онлайн-оқытудан өтеді.
Белгілі болғандай, курстар базалық деңгейдегі 11 пәнді қамтиды, олар: бастауыш сынып, қазақ, орыс және ағылшын тілдері, математика, информатика, физика, химия, биология, география және тарих.
– Оқыту «Өрлеу» LMS цифрлық платформасында өтеді, онда пәндік оқу материалдары мен мұғалімдер үшін қиындық тудыратын тақырыптарды айқындауға арналған диагностикалық тестілер ұсынылған. Бағдарлама пәндік білімді негізгі жұмысынан қол үзбей жаңарту, кәсіби құзыреттілікті арттыру және мұғалімдерге әдістемелік қолдау көрсетуге бағытталған, – деп хабарлайды министрліктің баспасөз қызметі.
Айта кетейік, өткен жылы «Келешек мектептері» ұлттық жобасы аясында 35 мектептен 2 мыңнан астам педагог біліктілікті арттыру курстарына қатысқан болатын.
