Өскеменде үй жағдайында қарасора өсіру фактісі әшкереленді, деп хабарлайды F16.kz тілшісі Polisia.kz сайтына сілтеме жасап.
– Облыс прокуратурасының үйлестіруімен полицейлер «Қарасора» жедел-алдын алу іс-шарасы барысында үй жағдайында есірткілік өсімдіктерді заңсыз өсіру дерегін анықтады. Тінту кезінде 58 жастағы Өскемен тұрғынының үйінен жарықтандыру және желдету жүйесі орнатылған арнайы «гроубокс», сондай-ақ ерекше иісті жасыл түсті өсімдіктері бар ыдыстар табылды. Сараптама қорытындысы олардың құрамында психоактивті компонент – дельта-9-тетрагидроканнабинолы бар қарасора екенін растады, – деп жазады дерек көзі.
Белгілі болғандай, тәркіленген заттың жалпы салмағы 570,55 грамға тең. Күдікті тұқымды интернет арқылы сатып алып, өзі тұтынбақ болғанын айтты. Аталған дерек бойынша ҚР Қылмыстық кодексінің (Құрамында есiрткi заттар бар, өсiруге тыйым салынған өсiмдiктердi заңсыз егу) бабы бойынша сотқа дейінгі тергеу басталды.
Полиция ескертеді: есірткілік өсімдіктерді заңсыз өсіру мен сақтау – қылмыстық жауапкершілікке әкеп соғады. Мұндай әрекетке барғандар міндетті түрде заң алдында жауап береді. Полиция азаматтарды заңға қайшы әрекеттерден бас тартып, қоғамда нашақорлықтың таралуына қарсы жұмысқа белсене үлес қосуға шақырады.
