Шығыс Қазақстан облысында полицейге шабуыл жасаған ер адам екі жылға бас бостандығын шектеу жазасына кесілді. Ол түрмеге тоғытылмай, пробация қызметінің есебіне алынды, деп хабарлайды F16.kz тілшісі Polisia.kz сайтына сілтеме жасап.
Оқиға құжаттарды тексеру кезінде болған. Полиция қызметкерлері ішінде екі ер адам отырған көлікті тоқтатқан. Олардың бірі есірткіге мас күйде болып, құжаттарын көрсетуден бас тартқан, құқық қорғау органдарының қызметкерлеріне бағынбай, агрессивті әрекеттер жасаған. Жағдай тез ушығып, жанжалға ұласқан. Ер адам полицейлерге тас лақтырып, біріне дене жарақатын салған.
Сот шешімімен, ер адам екі бап бойынша кінәлі деп танылды: есірткі құралдарын тұтыну және билік өкілдеріне қатысты күш қолдану. Алайда, сот істің мән-жайын ескеріп, бас бостандығынан айырумен байланысты емес жаза тағайындады.
Енді құқық бұзушы пробация қызметіне үнемі келіп тұруға міндетті. Оған құқықтары мен міндеттері, соның ішінде есірткі тұтынуға және құқық бұзушылықтар жасауға тыйым салынғандығы түсіндірілді. Белгіленген ережелерді бұзған жағдайда, бас бостандығын шектеу жазасы нақты түрме мерзіміне ауыстырылуы мүмкін.
– Біздің міндетіміз – адамды қамау емес, оған қоғамның пайдалы мүшесі болуға көмектесу. Біз оның қайта қылмыс жасауына жол бермеу үшін әр қадамын бақылайтын боламыз. Бұл сот төрелігі жүйесі тек жазалап қана қоймай, екінші мүмкіндік те беретінінің айқын мысалы, – деп түсіндірді ШҚО ҚАЖД Шемонаиха ауданы бойынша пробация қызметі бөлімінің бастығы Гүлмира Бөлекбаева.
