ШҚО полицейлері танысынан «бірлескен бизнес ашамыз» деген сылтаумен миллион теңгеден астам ақша алып алдаған азаматты ұстады, деп хабарлайды F16.kz тілшісі Polisia.kz сайтына сілтеме жасап.
Тексеру барысында полицейлер күдіктінің алдын ала дайындаған схема бойынша әрекет еткенін және бірнеше адамды алдағанын анықтаған. Ол таныстарын «мол табыс» әкелетін кәсіпке ақша салуға үгіттеген. Біріне арзан бағада көлік алып беремін деп, екіншісіне қарызды сыйақысымен қайтарамын немесе пәтер сатып алуға көмектесемін деп уәде берген. Осылайша ер адам бірнеше жәбірленушінің ірі көлемдегі қаражатын иемденген.
– Оның қылмыстық әрекеті жалпы сомасы 41 миллион теңгеден асатын шығын келтірген. Күдікті ұсталып, уақытша ұстау изоляторына қамалды, – деп жазады дерек көзі.
Аталған фактілер бойынша сотқа дейінгі тергеу жүріп жатыр. Қазіргі уақытта күдіктінің осыған ұқсас өзге де алаяқтық фактілеріне қатысы бар-жоғы тексерілуде.
