ШҚО полицейлері мен облыстық прокуратура мамандары есірткіні заңсыз сақтап, өсірді деген күдікпен Глубокое ауданының 22 жастағы тұрғынын ұстады, деп хабарлайды F16.kz тілшісі Polisia.kz сайтына сілтеме жасап.
– Тәртіп сақшылары жедел тінту барысында күдіктінің үйінің аумағынан өзіне тән иісі бар өсімдік бұталарын тапқан. Сонымен қатар шыны банка мен кептірілген өсімдік салынған қап, металл табақшалар мен ыдыс-аяқ табылды. Бұған қоса өсімдіктер салынған кептіргіш машина тәркіленді, – деп жазады дерек көзі.
Сараптама нәтижесіне сәйкес, тәркіленген заттың марихуана екені анықталды. Психотроптық заттың салмағы – 4 келі. Тінту барысында мамандар салмағы 1,2 келіге жететін каннабис өсімдігінің бұтасын да тапты. Аталған фактілер бойынша күдіктіге қатысты сотқа дейінгі тергеу жұмыстары жүріп жатыр.
