Қазақстандық режиссёр Думан Еркімбектің «Qaitadan» атты дебюттік толықметражды фильмі үш апта ішінде 1 миллиард теңгеден астам табыс тауып, отандық кинопрокаттың көшін бастады, деп хабарлайды F16.kz тілшісі Мәдениет және ақпарат министрлігіне сілтеме жасап.
Осылайша, аталмыш фильм кино өндірісіне жұмсалған мемлекет қаражатынан бес есе артық табыс тапқан алғашқы қазақстандық жоба атанып отыр.
Көрермен көзайымына айналып үлгерген «Qaitadan» фильмінің оқиға желісі ерекше әсер қалдырады. Бұл фильм – көркем шығарма ғана емес, шынайы сезімге негізделген, терең драмалық мазмұндағы туынды. Кино астарында қауіпсіздік, жауапкершілік пен бірлік идеясы жатыр, әрі жастарды достыққа, бауырмалдыққа жетелейді. Фильмде отбасы институты дәріптеліп, әлеуметтік жауапкершілік пен адамгершілік қағидаттары көрініс табады.
– «Qaitadan» – қазақ киносының жаңа белеске көтерілгенін айғақтайтын фильм. 2023 жылы питчинг жеңімпазы атанған бұл жоба ҚР Мәдениет және ақпарат министрлігі және Ұлттық киноны қолдау мемлекеттік орталығының қолдауымен түсірілген болатын, – деп жазады министрліктің баспасөз қызметі.
Ұлттық киноны қолдау мемлекеттік орталығының Басқарма төрағасы Құрманбек Жұмағалидың айтуынша, бүгінде Қазақстанның киноиндустриясы қарқынды дамып келеді. Бұл ұлттық контентті ілгерілетуге, тұрақты қолдау жүйесін қалыптастыруға және халықаралық ынтымақтастықты кеңейтуге мүмкіндік беріп отыр. Соның арқасында жас режиссерлер мен дебюттік жобалардың алдында жаңа перспективалар ашылды. «Qaitadan» – соның айқын дәлелі.
