Бүгінде елімізде 8,5 миллионға жуық адам жүйелі түрде спортпен шұғылданса, олардың 1,5 миллионнан астамы балалар екен. Бұл туралы Туризм және спорт министрлігі хабарлайды, деп жазады F16.kz.
Белгілі болғандай, қазіргі уақытта мемлекеттік спорттық және шығармашылық тапсырыс аясында 240 мың бала 7 мыңға жуық секцияға тегін қатысып жүр. 2025 жылдан бастап алты қалада қанатқақты ваучерлік қаржыландыру жүйесі енгізілді.
Соңғы бес жылда елімізде 371 спорт нысаны пайдалануға берілді. 2025 жылдың бірінші жартыжылдығында тағы 32 нысан іске қосылды. Жыл соңына дейін 70 нысанның құрылысын аяқтау жоспарланып отыр. Олардың қатарында Астанадағы Ұлттық спорт университеті, Түркістандағы ескек есу каналы және Қызылордадағы көпбейінді стадион сияқты нысандар бар.
– Қазіргі уақытта Қазақстанда 28 футбол стадионы және 7,4 мыңнан астам балалар алаңы жұмыс істейді. Алдағы жылдары жергілікті бюджеттер мен инвестициялар есебінен жаңа стадиондар салынып, қосымша 667 балалар футбол алаңы пайдалануға берілмек, – деп жазады дерек көзі.
