12 шілде күні Катонқарағай ауылындағы дене шынықтыру-сауықтыру кешенінде жерлесіміз, КСРО спорт шебері, қазақ күресінің даңқты палуаны Сергей Сейітқалиұлы Ахметовты еске алуға арналған қазақ күресінен жасөспірімдер арасындағы республикалық турнир өтті, деп хабарлайды F16.kz сайты.
Биыл алғаш рет ұйымдастырылған жарыстың басты мақсаты – атақты балуанның жарқын спорттық жолын кейінгі жас ұрпаққа үлгі ету, ұлттық спортты дамыту, салауатты өмір салтын насихаттау және бұқаралық спорттың өрісін кеңейту.
Турнирді ұйымдастырған Ахметовтер әулетінің өкілдері бұл бәсекені алдағы уақытта дәстүрлі түрде жыл сайын өткізуді жоспарлап отырғандарын жеткізді.
Дүбірлі додаға Абай, Павлодар, Жамбыл және Шығыс Қазақстан облыстарынан, сондай-ақ Астана қаласынан 2006–2008 жылдары туған жас палуандар қатысып, әртүрлі салмақ дәрежелерінде бақ сынады.
Жарыстың салтанатты ашылу рәсімінде аудан әкімінің орынбасары Фархад Құсайынов, қазақ күресінен Шығыс Қазақстан облыстық федерациясының президенті Оразбек Базарбай, «Қазақ күресі» ұйымының төрағасы Қайрат Мазкенов және Сергей Ахметовтың кенже ұлы Қуат Ахметов қатысушыларға сәттілік тілеп, турнирдің маңыздылығына тоқталды.
Іс-шара барысында марқұм палуанның замандастары, спорт ардагерлері Арасан Ахметов, Ахмет Бұқатов және Жексен Иқамбаев Сергей Ахметовтың спорттағы жетістіктері мен адамгершілік қасиеттері жайлы естеліктерімен бөлісіп, жарысты ұйымдастырушыларға ризашылықтарын білдірді. Олар жас балуандарға ақ жол тілеп, ел намысын қорғайтын спортшылар болып қалыптасуларына тілектестік білдірді.
Республикалық турнирдің жалпы жүлде қоры 2 миллион теңгені құрады.
Жарыс қорытындысы бойынша 48 келі салмақ дәрежесінде Малика Бердімұратова жеңімпаз атанса, Виктория Каверина екінші орынға ие болды.
52 келіде Адия Дәулетханова алтын медаль жеңіп алды. Күміс жүлде Дина Ақылбекқызына, қола медаль Жанеля Байсалбаеваға бұйырды.
65 келі салмақта Дильназ Жумалинова үздік шықса, Аяна Қуанышбек екінші, Анель Амангельдиева үшінші орынға тұрақтады.
90 келі салмақта Ерасыл Черияздан чемпион атанып, Бексұлтан Төлеубекұлы күміс, Әлем Шәкебай қола жүлдегер атанды.
Ал +90 келі салмақ дәрежесінде Асанали Арманұлы жеңіс тұғырының ең биік сатысына көтерілді. Екінші орынды Ерлан Шыңғыс, үшінші орынды Нұрәділ Кенжебаев иеленді.
Осындай тағылымды турнирлер ұлттық спорттың дамуына серпін беріп қана қоймай, қазақ күресінің өркендеуіне зор үлес қосқан тұлғалардың есімін ұлықтауға, жас буынды елжандылық пен спортқа баулуға ықпал ететіні сөзсіз.
