Өскеменде үстел теннисінен «Major Cup» атты ашық республикалық турнир өз мәресіне жетті, деп хабарлайды F16.kz.
Облыс әкімдігінен хабарлағандай, турнир 9-10 қыркүйек күндері өтіп, оған еліміздің түкпір-түкпірінен келген 60-тан астам спортшы қатысты. Арасында ұлттық құраманың мүшелері мен ТМД елдерінен келген спортшылар да болды.
Тартысты да қызықты өткен жарыс қорытындысы бойынша бірінші орынды шымкенттік Никита Мошков жеңіп алды. Жүлделі екінші орынға Шығыс Қазақстан облысының өкілі Алексей Жуков ие болса, үздік үштікті алматылық Санжар Жұбанов түйіндеді.
Жарыс жүлдегерлерін Шығыс Қазақстан облысының басшылығы арнайы келіп құттықтады.
– Бүгінде біздің облыста үстел теннисімен 2 мыңға жуық спортшы шұғылданады. Оның 400-і дәл осы Теннис орталығында жаттығады. Бұл – заманауи ғимарат. Мұнда спорт мектебі жұмыс істейді, оның тәрбиеленушілері республикалық жарыстарға қатысып жүр. Біз барлық жастағы және спорт түрлеріндегі спортшыларды қолдауға тырысамыз. Бүгін өте қызықты ойындардың куәсі болдық. Шын жүректен жеңістеріңізбен құттықтаймын, алда үлкен жетістіктер тілеймін, – деді жүлдегерлерді марапаттау кезінде сөз алған облыс әкімі Нұрымбет Сақтағанов.
