Шымкентте конькимен мәнерлеп сырғанаудан Қазақстан чемпионаты мәресіне жетті. Спорт мектептерінің тәрбиеленушілері мен спорт клубтарының өкілдері арасында өткен бұл жарыста Шығыс Қазақстан облысының спортшылары екі жүлдеге ие болды, деп хабарлайды F16.kz порталы конькимен мәнерлеп сырғанаудан облыстық федерацияның баспасөз қызметіне сілтеме жасап.
Алғашқы медаліне ШҚО құрамасы жарыстың бірінші күнінде-ақ қол жеткізді. Бірінші разрядты жасөспірімдер арасындағы сайыста өнер көрсеткен Михаил Зиновьев 17,81 ұпаймен үшінші орынға ие болды.
Сол сияқты өскемендік Мария Сосновская да жарысқа жоғары дайындықпен келгенін дәлелдеді. Бірінші спорттық разряд санатында өнер көрсеткен ол қысқа бағдарламада 39,85 ұпай жинап, жеке рекорд орнатты. Жерлесіміздің негізгі қарсыласы саналатын астаналық Айару Қожагелді еркін бағдарламада қателік жіберіп, жүлдеден тыс қалып қойды.
Финалда Сосновская мен павлодарлық Мария Санникова арасындағы бәсеке өте тартысты өтті. Нәтижесінде Санникова 79,71 ұпай иеленсе, Сосновская 79,81 ұпай жинап, тағы бір мәрте мықтылығын дәлелдеді. Жалпы есепте 119,66 ұпай алған шығысқазақстандық спортшы ел чемпионы атағына ие болды.
Басқа санаттарда да ШҚО спортшылары тәп-тәуір өнер көрсеткенімен, медаль иелене алмады. II жасөспірімдер разрядында Балжан Мұратбек 39 қатысушының ішінде төртінші орын алды (22,20 ұпай). Ал спорт шеберлігіне үміткерлер арасындағы жарыста бірден екі шығысқазақстандық спортшы үздік ондыққа енді.
Айта кетейік, 15-19 қараша аралығында Өскеменде жастар арасындағы Қазақстан чемпионаты өтеді.
