Алматыда джиу-джитсуден мәресіне жеткен «Samurai Absolute» қалалық ашық чемпионатында жерлесіміз Аслан Советов тамаша нәтиже көрсетті, деп хабарлайды F16.kz.
Облыстық Төтенше жағдайлар департаментінің мәліметі бойынша, байрақты бәсекеге Қазақстан, Қырғызстан, Өзбекстан мен Ресейдің мыңнан астам спортшысы қатысқан.
Додада еліміздің намысын Өскемен қаласындағы Мамандандырылған жасақтың өрт сөндіруші-құтқарушысы Аслан Советов те қорғаған болатын. Жерлесіміз екі санатта («GI» және «NO – GІ», 69,5 келі) өнер көрсетіп, екеуінде де тұғырдың ең биік сатысына көтерілді.
Осылайша, ол қыркүйек айында өтетін Әлем чемпионатына жолдама ұтып алды.
Аслан Советов бала кезінен түрлі жекпе-жек түрімен шұғылданған. Оның еншісінде бірнеше дүбірлі доданың жүлдесі бар. Әсіресе, өткен жылы Мәскеуде ұйымдастырылған Әлем чемпионатындағы күміс жүлденің орны бөлек.
Ол өрт сөндіруші-құтқарушылар қатарына 10 жыл бұрын келіп қосылған. Басшылық тарапынан жасалған жағдайдың арқасында Аслан қызмет пен спортты қатар алып жүр және екеуінде де жоғары нәтижелерге қол жеткізіп келеді.
