Еліміздің өңірлерінде елді мекендерді ықтимал су тасқынынан қорғау және су басу тәуекелдерін азайту бойынша жұмыстар жалғасуда. Іс-шаралар алдағы тасқын кезеңінде халықтың қауіпсіздігін қамтамасыз ету мен инфрақұрылым нысандарын қорғауға бағытталған, деп хабарлайды F16.kz тілшісі Төтенше жағдайлар министрлігіне сілтеме жасап.
Ведомстводан хабарлағандай, бүгінде Шығыс Қазақстан облысында да бұл бағытта қажетті жұмыстар жүргізілуде. Мәселен, Глубокое ауданының Тарханка ауылындағы Үлбі өзенінде су тасқынына қарсы жұмыстар қызып тұр. Су тасқыны кезінде өзен деңгейінің көтерілуінен ауылдың бір көшесін қорғау мақсатында бұған дейін салынған бөген жаңғыртылып жатыр.
– Тасқын судың өтуіне мониторинг жүргізу өзеннің жоғары ағысында судың арналарға еніп, орнатылған бөгенді айналып өтіп, қоршалған өзен арнасын толтырып, жағалауды шайып кету қаупін тудыратынын көрсетті. ТЖ жөніндегі комиссия өзеннің ағысы бойымен жоғары орналасқан арналарды жабуды ұсынды, бұл тасқын судың өтуінің оң динамикасын қамтамасыз етеді, – делінген министрліктің хабарламасында.
Жүргізіліп жатқан инженерлік және ұйымдастырушылық іс-шаралар су басу қаупін айтарлықтай төмендетуге, ықтимал тасқындардың салдарын барынша азайтуға және өңір тұрғындарының қауіпсіздігін қамтамасыз етуге мүмкіндік береді. Су тасқыны кезеңіне дайындық жұмыстары жалғаса бермек.
