Бүгін Шығыс Қазақстан облысының Катонқарағай ауданында «Алтай – түркі әлемінің алтын бесігі» халықаралық фестивалінің шарықтау шегі – гала-концерт өтті. Түркі халықтарының ортақ мәдениеті мен рухани мұрасын ұлықтаған ауқымды шараға әлемнің әр түкпірінен 50 мыңға жуық көрермен жиналды, деп хабарлайды F16.kz сайты.
Шығыс Қазақстан облысы әкімдігінің қолдауымен ұйымдастырылған концерт театрландырылған «Пырақ» қойылымымен ашылды. Қойылымда түркі дүниесінің киелі символы – ақ қанатты тұлпардың бейнесі арқылы Ұлы дала өркениеті, көшпенділер мәдениеті мен жылқының адамзат тарихындағы айрықша орны көркем тілмен бейнеленді.
Фестиваль қонақтарын облыс әкімі Нұрымбет Сақтағанов құттықтап, Алтайдың түркі жұрты үшін тарихи әрі рухани маңызына тоқталды.
– Адамзат өркениетінің көне ошағы, ұлы көшпенділердің алтын бесігі, тұтас түркі жұртының түпқазығы саналатын қасиетті Алтай төріне қош келдіңіздер! Біз үшін Алтай – өткеннің ескерткіші ғана емес, бүгінгі бауырлас халықтарды ортақ құндылықтар төңірегіне топтастыратын рухани өзек. Мемлекет басшысы Қасым-Жомарт Тоқаев түркі мемлекеттерінің тарихи және мәдени мұрасын сақтау – баршамызға ортақ міндет екенін атап өткен болатын. Өр Алтайдың асқақ рухы түркі әлемінің бірлігін нығайта берсін, – деді аймақ басшысы.
Концертте Қазақстан, Әзербайжан, Венгрия, Қырғызстан, Өзбекстан, Түркия, Қарақалпақстан, Башқұртстан, Тыва Республикасы және Моңғолиядан келген өнерпаздар өнер көрсетті. Түркі әлемінің әншілері ұлттық және заманауи шығармаларды орындап, көрермендердің ыстық ықыласына бөленді.
Кештің ең әсерлі сәттерінің бірі – әлемге танымал қазақстандық әнші Димаш Құдайбергеннің сахнаға шығуы болды. Мыңдаған жанкүйер сүйікті әншісін ерекше қошеметпен қарсы алып, әндерін бірге орындап, мерекелік кештің көркін қыздыра түсті.
Осылайша, бірнеше күнге созылған «Алтай – түркі әлемінің алтын бесігі» халықаралық фестивалі жоғары деңгейде қорытындыланып, қатысушылар мен қонақтарға ұмытылмас әсер сыйлады.
Еске салсақ, фестиваль Берел ауылындағы «Патшалар алқабы» тарихи-мәдени кешенінде басталған болатын. Ұлт ақыны Ақтан Нұрбаевтың 100 жылдығына арналған ас беріліп, «Төр Алтай Ақтанын жырлайды» поэзия фестивалі өтті. Сондай-ақ көкпар мен бәйге ұйымдастырылып, ұлттық спорт түрлері дәріптелді. Ал «Ақтанымын Алтайдың» республикалық ақындар айтысында еліміздің әр өңірінен келген 12 үздік айтыскер бақ сынады.
