Катонқарағай ауданында өтіп жатқан халықаралық «Алтай – түркі әлемінің алтын бесігі» фестивалі аясында «Ақтанымын Алтайдың» республикалық ақындар айтысы ұйымдастырылды. Өнер додасына еліміздің әр өңірінен келген 12 айтыскер қатысып, Ақтан Нұрбаевтың шығармашылығын, ұлттық руханиятты, елдік пен бірлікті, тәуелсіздік пен дәстүр құндылықтарын жырға қосты, деп хабарлайды F16.kz тілшісі.
Айтысқа Қарағанды облысынан Мақсат Ақанов, Павлодар облысынан Аспанбек Шұғатаев, Астана қаласынан Мейірбек Сұлтанхан, Маңғыстау облысынан Абай Жолмағамбет, Түркістан облысынан Дәурен Ақсақалов, Алматы қаласынан Шұғайып Сезімхан, Жамбыл облысынан Қанат Мырзахан мен Жанерке Қамбар, Абай облысынан Қуандық Кенжебекұлы, Шымкент қаласынан Нұрлан Есенқұл, Шығыс Қазақстан облысынан Серік Қуанған мен Жұлдызай Маратбекқызы қатысты.
Жыр сайысын ақын, Қазақстан Республикасының еңбек сіңірген қайраткері Аманжол Әлтай жүргізді. Қазылар алқасына Қазақстанның халық жазушысы Жүрсін Ерман төрағалық етті. Сондай-ақ қазылар құрамында Серік Құсанбаев, Құдайберлі Мырзабеков, Қойлыбай Асанов, Ұлықбек Есдәулет, Дәулеткерей Кәпұлы, Жанарбек Әшімжан және айтыс сарапшысы Өміржан Көпбосынов болды.
Қазылар шешімімен үшінші орын Шұғайып Сезімхан мен Дәурен Ақсақаловқа бұйырып, әрқайсысына 750 мың теңгеден табысталды. Екінші орынды Абай Жолмағамбет пен Мақсат Ақанов иеленіп, 1 миллион теңгеден сыйақы алды. Бірінші орынға Мейірбек Сұлтанхан лайық деп танылып, 2 миллион теңге иеленді.
Ал республикалық айтыстың бас жүлдесі мен автокөлігі Шығыс Қазақстан облысының намысын қорғаған Серік Қуанғанға бұйырды. Байқауға қатысқан өзге ақындардың әрқайсысына 500 мың теңгеден ынталандыру сыйлығы берілді.
Марапаттау рәсімінде Шығыс Қазақстан облысының әкімі Нұрымбет Сақтағанов сөз сөйлеп, айтысқа төрелік еткен қазылар алқасының төрағасы Жүрсін Ерманға алғыс білдірді.
– Бүгін киелі Шығыс жерінде от ауызды, орақ тілді ақындардың өнерін тамашаладық. Кешелі бері жұртшылық өлең-жырға қанығып, ерекше әсер алды. Биыл 75 жасқа толған Жүрсін Ерман ағамызға облыс жұртшылығы атынан автокөлік сыйлауға рұқсат етіңіздер, – деді аймақ басшысы.
Осыдан кейін Нұрымбет Сақтағанов Жүрсін Ерманға жаңа автокөліктің кілтін табыс етті.
Фестиваль аясындағы мерекелік шаралар мұнымен аяқталған жоқ. Бүгін кешке өтетін гала-концертте Қазақстан, Әзербайжан, Венгрия, Қырғызстан, Өзбекстан, Түркия, Қарақалпақстан, Башқұртстан, Тыва Республикасы және Моңғолиядан келген өнерпаздар сахнаға шығады. Көрермендер ерекше ықыласпен әлемге танымал әнші Димаш Құдайбергеннің өнер көрсетуін күтуде.
