«Алтай – түркі әлемінің алтын бесігі» фестивалі барысында шетелдік туристерге С. Ластаев атындағы мектептің оқушылары көмек көрсетті, деп хабарлайды F16.kz.
13 оқушы ағылшын тілі пәнінің мұғалімі Майкл Секарро Напалмен бірге қонақтарға фестиваль алаңдарын табуға бағыт-бағдар беріп, іс-шара бағдарламасы туралы ақпарат ұсынып, ағылшын тілінде қойылған сұрақтарға жауап берді.
Еріктілерді көпшілік оңай танып, көмек сұрай алуы үшін оқушылар «I speak English» деген жазуы бар арнайы футболкалар киген. Бұл шетелдік қонақтар үшін үлкен қолдау болса, оқушылардың өздері үшін ағылшын тілін тәжірибе жүзінде қолдануға тамаша мүмкіндік болды.
Айта кетейік, Майкл Секарро Напал – ағылшын тілін оқыту саласында он жылдан астам тәжірибесі бар педагог. Қазақстанға келгенге дейін ол Сауд Арабиясы мен Филиппинде жұмыс істеп, Жапония мен Қытай студенттеріне онлайн форматта сабақ берген. Қазіргі таңда Катонқарағай ауданындағы мектепте ағылшын тілі пәнінен дәріс беріп, жоғары сынып оқушыларын IELTS және TOEFL халықаралық емтихандарына дайындайды. Сонымен қатар STEM бағытындағы сабақтар өткізіп, пікірсайыс клубтары мен театрландырылған қойылымдар ұйымдастырады.
Шығыс Қазақстан облысында ол “Білім беруді тұрақты дамыту қоры” жүзеге асырған жоба аясында еңбек етіп жүр.
Оқушылар өз ауылдарының жақсы жағынан таныстыра білді. Бұл бағдарлама жастарға жаңа мүмкіндіктер ашып қана қоймай, Катонқарағайдың қонақжайлық мәдениетін нығайтуға да ықпал етеді, – деді Майкл Секарро Напал.
