Өскеменді түтін тұмшалап тұрғанына бүгін үшінші күн. Тыныс алу күн өткен сайын қиындап барады. Шаһар тұрғындары тамақ, бас ауруына шағымданып, оқушыларды қашықтан оқу орматына ауыстыруды сұрап жатыр, деп хабарлайды F16.kz.
Ата-аналарды толғандырған сұраққа қалалық білім бөлімінің өкілдері жауап берді.
— Мектепте сабақты тоқтату тек ауа райына байланысты, яғни қатты аяз, көктайғақ кезінде ғана мүмкін. Ал, қолайсыз метеорологиялық жағдай кезінде онлайн форматқа ауысу тәртібі әлі белгіленген жоқ. Бірақ жақында экология департаменті, ТЖД мамандарымен бірігіп ортақ шешімге келеміз, — деді Өскемен қалалық білім бөлімі басшысының міндетін атқарушы Думанғазы Арғынғазин.
Білім бөлімі мамандарының айтуынша, нормативтік құжаттар болмаған жағдайда олар өз бетінше шешім қабылдай алмайды.
Естеріңізге сала кетейік, былтыр қараша айында да бірнеше күн бойы шаһар аспанын қара түтін басқанда оқушылар қашықтықтан оқу форматына ауыстырылған.
— Егер бала өзін нашар сезінде сабаққа жібермеу керек. Ал, ауадағы зиянды заттар мөлшері нормадан асып кетсе мектеп директоры өз бетінше шешім қабылдай алады. Алайда, міндетті түрде бізге хабарлауға тиіс, — деді Думанғазы Арғынғазин.
