18 сәуір — Халықаралық ескерткіштер мен тарихи орындарды қорғау күні. 1983 жылдан бері атап өтілетін бұл мереке адамзаттың мәдени мұрасын сақтауға, ескерткіштерді қорғауға және олардың маңыздылығын түсіндіруге бағытталған. Бұл күні ШҚО-да «Мәдени мұраны бірге сақтайық» республикалық акциясы ұйымдастырылады, деп хабарлайды F16.kz.
Аталған акция Мемлекет басшысының тапсырмасы аясында және «Таза Қазақстан» жалпыұлттық акция бастамасы шеңберінде жүзеге асырылмақ.
Іс-шара ҚР Мәдениет және ақпарат министрлігінің қолдауымен, «Азаматтық Альянс» ЗТБ-ның «Madenietti Mura» жобасы негізінде және «Тарихи-мәдени мұра» КММ өкілдері мен волонтерлік жобалар үйлестірушілерінің қатысуымен өткізіледі.
Барлық өңірлерде тарихи-мәдени нысандарды тазалау және абаттандыру бойынша волонтерлік іс-шаралар ұйымдастырылады. Қала тұрғындары, ұйымдар мен кәсіпорын өкілдерін, шағын және орта бизнес субъектілерінің өкілдерін жалпықалалық сенбіліктерге белсене қатысып, қаламыздың көркеюіне өз үлестеріңізді қосуға шақырамыз, — деді қала әкімінің баспасөз қызметі.
Естеріңізге сала кетейік, сенбіліктер әр сенбі сайын 30 мамырға дейін жалғасады.
