Шағын және орта бизнес өкілдерінің өтінішін қарау кезінде Шығыс Қазақстан облысының әкімі Нұрымбет Сақтағанов кәсіпкерлік бастамаларды қарау уақыты бірнеше айға, тіпті жылға созылып кеткен жағдайлар бойынша қызметтік жазба әзірлеуді тапсырды, деп хабарлайды F16.kz.
Азаматтарды жеке қабылдау кезінде өңірде тек идеямен шектелмей, өз қаржысын салуға, жұмыс орындарын ашуға және әлеуметтік жауапкершілікті өз мойнына алуға дайын бизнес өкілдерінің аз емес екені белгілі болды. Бірақ тиісті қолдаудың орнына кәсіпкерлер құжаттарды қарау мерзімін созу, шығарыпсалма жауаптар, нақты шешімдердің жоқтығы сияқты кедергілерге тап болады.
Кәсіпкерлер бюджеттен қаржы сұрап отырған жоқ, оларға тек қолдау көрсету керек. Бұл – атқарушы биліктің тікелей міндеті. Шағын және орта бизнеске қолдау қағаз жүзінде емес, нақты болуы қажет, – деді облыс әкімі.
Аймақ басшысының тапсырмасына сәйкес дайындалатын қызметтік жазбада мынадай нақты сұрақтарға жауап берілуге тиіс:
Құжаттарды рәсімдеу барысында кезектілік пен регламент сақталды ма;
Қарау қанша уақытқа созылды;
Жобаны сүйемелдеу бойынша қандай нақты әрекеттер атқарылды;
Жобаның болашағы қандай.
Кәсіпкерлермен атқарылатын жұмыс жүйелі әрі ашық болуға тиіс. Әкімшілік кедергілер немесе немқұрайлылық болған жағдайда ол мәселе жеке қаралады.
Егер бизнес жұмыс істеуге, өңірді дамытуға және қаржы салуға дайын болса, биліктің міндеті – кедергі келтірмей, көмектесу. Бұл үшін де жеке жауапкершілік бар, – деп түйіндеді Нұрымбет Сақтағанов.
