Облыс орталығындағы Қабанбай батыр, Лев Толстой және Новаторов көшелеріндегі көпқабатты тұрғын үйлер әлі де жылусыз отыр, деп хабарлайды F16.kz.
Естеріңізге сала кетейік, бүгін сағат таңғы 03.20-да Өскемен қаласының сол жағалау бөлігінде электр қуаты ажыратылып, соның салдарынан жылумен жабдықтау жүйесінің жұмысы уақытша тоқтатылды. Атап айтқанда, Жібек маталар комбинатындағы №2 қазандық, Ахмер ауылындағы №5 қазандық, Меновное ауылының №6 және №7 қазандықтары істен шықты.
Салдарынан қаланың оң жағалау бөлігіндегі жылу желілерінде қысым күрт жоғарылап, Новаторов көшесі, 2 және Назарбаев даңғылы, 6 мекенжайының маңындағы жылу желілерінде ақаулар пайда болды, — делінген «Шығыс Жылу» кәсіпорнының ақпаратында.
Қазір Қабанбай батыр көшесіндегі 68, 72, 78, 80, 82, 84-ші үйлерге, Лев Толстой көшесіндегі 26-шы және Новаторов көшесіндегі 2, 4, 6-шы үйлерге, сондай-ақ бірнеше мекеме мен балабақшаға жылу әлі берілген жоқ.
