Өскеменде түркі дүниесінің көрнекті ойшылы Қожа Ахмет Ясауидің өмірі мен шығармашылық мұрасын дәріптеу мақсатымен «Ясауи оқулары» ұйымдастырылды. Танымдық іс-шара А.С.Пушкин атындағы облыстық кітапханада өтті, деп хабарлайды F16.kz.
«Ясауи оқуларына» Абай атындағы гуманитарлық колледж бен Қазақстан-Американдық еркін университетінің студенттері қатысты.
«Ясауи мұрасы: таным мен тағылым» деп аталған бірінші бөлім аясында қатысушылар Қожа Ахмет Ясауидің өмір жолы, өмір сүрген тарихи кезеңі, ұстаздары мен рухани ортасы, түркі дүниесіндегі орны туралы зерттеу жұмыстарын таныстырды. Сондай-ақ оның рухани мұрасының бүгінгі қоғам үшін маңызына тоқталды.
Екінші бөлім – «Хикмет кілті». Мұнда шәкірттер «Даналық сандығынан» таңдап алған «Диуани хикмет» шығармасынан үзінділерді талдап, олардың негізгі мағынасын ашты. Хикметтердегі имандылық, ізгілік, сабыр, қанағат, қайырымдылық пен адамгершілік құндылықтарын бүгінгі өмірмен байланыстырды.
Үшінші бөлім – «Ой таразысы» қатысушылардың сыни ойлау қабілетін шыңдай түсті. Студенттер академиялық адалдық, мансап пен адамгершілік, әлеуметтік желідегі жауапкершілік, қайырымдылық, әділдік және уақытты тиімді пайдалану тақырыптарындағы өмірлік жағдаяттарды талқылап, өз шешімдері мен пікірлерін ортаға салды.
– «Ясауи оқулары» «Кітап оқитын ұлт» тұжырымдамасының негізгі мақсаттарымен үндеседі. Өйткені кітап оқу – тек ақпарат жинау емес, адамның ой-өрісін кеңейтіп, дүниетанымын қалыптастыратын, рухани дамуына ықпал ететін маңызды үдеріс. Әсіресе, тарихи және әдеби мұраларды оқу арқылы жас ұрпақ ұлттық құндылықтарды тереңірек танып, өткеннің өнегесін бүгінгі өмірмен сабақтастыра алады. Қожа Ахмет Ясауидің хикметтерін оқу, талдау және ондағы ойларды өмірлік ұстанымдармен байланыстыру жастардың кітапқа деген қызығушылығын арттырып, оқырмандық мәдениетін қалыптастыруға ықпал етеді, – дейді кітапхана мамандары.
Іс-шара барысында қатысушылар ұлы ойшылдың мұрасы қай кезеңде де өзектілігін жоғалтпайтындығына тағы бір мәрте көз жеткізіп, рухани құндылықтардың адам өміріндегі маңызы жөнінде ой түйді.
