Ертең, 4 сәуірде облыс орталығы – Өскемен қаласында жалпықалалық сенбілік ұйымдастырылады, деп хабарлайды F16.kz.
Экологиялық акция аясында қала тұрғындары туған шаһарын тазартуға жұмыла кіріспек. Игі шараға ниет білдірген кез келген азамат қатыса алады. Бұл – коммуналдық қызметтердің ғана емес, әрбір тұрғынның ортақ жауапкершілігін көрсететін маңызды бастама.
Айта кетейік, қалада «Таза Қазақстан» экологиялық тұжырымдамасы аясында сенбіліктер ай соңына дейін жалғасады. Қазір көшелер мен қоғамдық орындардың тазалығына «Таза Өскемен» кәсіпорны жауапты болғанымен, қала тазалығын сақтау – баршаға ортақ міндет.
Сондықтан көпқабатты үйлердің тұрғындары, сондай-ақ дүкен, дәмхана және өзге де коммерциялық нысандардың иелері өздеріне тиесілі аумақтарды ретке келтіріп, сенбілікке атсалысуға шақырылады.
Мұндай шаралар қаланың көркін арттырып қана қоймай, тұрғындардың экологиялық мәдениетін қалыптастыруға да ықпал етеді. Таза қала – әрбір тұрғынның жанашырлығы мен жауапкершілігінің айқын көрінісі.
