Бүгін облыс орталығындағы Арбатта тұрғындарға құқық және қаржы мәселелері жөнінен тегін кеңес берілді. Amanat партиясының «Құқықтық көмек» жобасы аясында ұйымдастырылған шараға жеке сот орындаушылары, полиция қызметкерлері, заңгерлер, прокуратура өкілдері және «Қарызсыз қоғам» жобасының мамандары қатысты, деп хабарлайды F16.kz.
Мамандар шаһар тұрғындарының мәселесін тыңдап, толғандырған сұрақтарына жауап береді.
Бұл жоба халықтың құқықтық және қаржылық сауатын арттыруға бағытталған. Мұндағы басты мақсат — заң тұрғысынан кеңес берумен шектелмей, адамдардың мәселесі оң шешім табуына көмектеу. Бүгін шарада 40-қа жуық тұрғын көмек алды. Әрбір азаматтың өтінішін бақылауда ұстап, осындағы мамандармен бірге оның шешілуіне нақты ықпал етуге тырысамыз. Бұл шара осымен тоқтап қалмайды. Жыл көлемінде облыстың барлық аудан-қаласында ұйымдастыруды жоспарлап отырмыз, — деді Amanat партиясы Шығыс Қазақстан облыстық филиалының төрағасы Жанат Мекеева.
Іс-шара барысында қоғамда белең алып, шешімін таппай келе жатқан интернет алаяқтықтың алдын алу мәселесі де ерекше назарға алынған. Полиция қызметкерлері алаяқтардың құрбанына айналған жандарды қабылдап, алаңға келген әр тұрғынға сақтық шараларын түсіндірді.
Бізге қазір ғана төрт азамат жүгінді. Олардың ішінде интернет алаяқтарға алданғандар және кеңес алуға келгендер бар. Қазір 1414 арқылы хабарлама жіберіп немесе өзін курьерлік қызмет, «Қазпошта» қызметкері ретінде таныстырып, түрлі сылтаумен код сұрайды. Ондағы басты мақсат – адамның жеке деректеріне қол жеткізу. Мұндай жағдайларда бейтаныс адамдарға SMS арқылы келген кодты айтуға болмайды. Алаяқтардың алдау схемасы да жиі өзгереді. Халықты хабардар етіп отыру өте маңызды, — деп атап өтті ШҚО ПД киберқылмысқа қарсы іс-қимыл басқармасының бастығы, полиция полковнигі Бекжан Малғаждаров.
«Құқықтық көмек» жобасы алдағы уақытта да өңір тұрғындарына нақты қолдау көрсетуді жалғастыратын болады.
