Облыс аумағында «Мигрант» жедел-профилактикалық іс-шарасы басталды. Бір күннің ішінде 50-ден астам шетел азаматы әкімшілік жауапкершілікке тартылды, деп хабарлайды F16.kz.
17 наурызда Өскемендегі құрылыс нысандарының бірінде көршілес мемлекеттің 21 азаматы тұрғын үй кешенінің құрылысында тиісті рұқсатсыз еңбек қызметін жүзеге асырған, — дейді ШҚО ПД баспасөз қызметі.
ШҚО ПД Көші-қон қызметі басқармасының бастығы Ринат Шкибаевтың айтуынша, жұмыс беруші де Қазақстан Республикасы Әкімшілік құқық бұзушылық туралы кодексінің екі бабы бойынша шетелдік жұмыс күшін заңсыз тартқаны және шетел азаматтарының келуі туралы хабарламағаны үшін әкімшілік жауапкершілікке тартылды. Айыппұл мөлшері 100 АЕК-ті құрады.
