Қыстың алғашқы айында ауа райы құбылмалы болады. Елдің басым өңірінде қар жауып, термометр бағаны төмендесе, кей жерлерде бұрқасын соғып, тұман мен көктайғақ болуы мүмкін, деп хабарлайды F16.kz.
Синоптиктердің болжамынша, Шығыс Қазақстанда ауа температурасы нормадан 1°С төмен болады.
Желтоқсанның бірінші онкүндігінде атмосфералық фронттардың өту әсерінен тұрақсыз ауа райы сақталады: батыста, солтүстікте, шығыста және орталықта жауын-шашын болады. Қазақстанның шығыс, оңтүстік-шығысындағы таулы және тау бөктеріндегі аудандарда қалың қар жауады. Республика бойынша бұрқасын, көктайғақ болып, тұман басады, — делінген Қазгидромет хабарламасында.
Шығыс Қазақстанда желтоқсанның басында ауа температурасы 0, -8°С аралығында болады деп болжанып отыр.
Алайда онкүндіктің соңына қарай солтүстік-батыс антициклоны Арктикадан келетін суық ауа массаларымен қосылып, ел аумағының басым бөлігінде ауа температурасының төмендеуіне әсер етеді. Кей аудандарда -10-18°С, түнде -23°С дейін аяз болады.
Екінші және үшінші онкүндіктерде түнгі уақытта -15-20°С-тан -5-10°С-қа дейін ауытқиды, күндіз әлсіз оң мәндегі -3+2°С-тан -5-10°С-қа дейін өзгереді, ал шығыста кей күндері түнде температура -25-35°С-қа, күндіз -15-20°С-қа дейін төмендеуі мүмкін, — делінген хабарламада.
