ШҚО-да тұмау әлі де өршіп тұр. ЖРВИ жұқтырғандар саны да күн сайын артып келеді. Оның басым бөлігі балалар. Бұл туралы облыстық санитарлық-эпидемиологиялық бақылау департаменті мәлім етті, деп хабарлайды F16.kz.
1 қазаннан бері өңірде 93358 адам ЖРВИ жұқтырған. 14 жасқа дейінгі бала саны — 58 517.
Бір жасқа дейінгі 1060 сәби аталған инфекцияны жұқтырды. Жүкті әйелдер арасында 276 жағдай тіркелді, — дейді департамент басшысы Қанат Тұрдиев.
Сондай-ақ «Гонконг тұмауына» қатысты 73 жағдай расталды. Оның ішінде 14 жасқа дейінгі балалар арасында 37 факті анықталған.
Тұмау немесе ЖРВИ белгілері болса көпшілік жерге бармай, үйде емделген жөн. Дұрыс тамақтанып, бөлмені жиі желдету керек, — дейді департамент мамандары.
Биыл ЖРВИ және тұмаудың эпидемиялық маусымында жергілікті бюджет есебінен 76,7 млн тенгеге тұмауға қарсы Гриппол плюс вакцинасының 75000 дозасы сатып алынған. Жұмыс берушілер есебінен және ақылы түрде екпе салу үшін 2000 доза алынды. Осылайша, қазіргі таңда облыс бойынша 77 000 адам тұмауға қарсы екпе салдырды. Бұл өңір тұрғындарының 10%-нан асады.
