Риддер қаласында туризм мен әлеуметтік инфрақұрылымды дамытуға бағытталған бірқатар ауқымды жоба кезең-кезеңімен іске асырылып жатыр, деп хабарлайды F16.kz сайты.
Бүгінде Риддердегі негізгі басымдықтардың бірі – туристік әлеуетті арттырып, өңірдің тартымдылығын күшейту.
Қала әкімі Думан Рахметқалиевтің айтуынша, биыл туристік салада бес ірі жобаны жүзеге асыру жұмыстары жалғасуда.
– Қазіргі уақытта Ridder Resort Hotel қонақүйін қайта жаңғырту, Cabana de Poperechnoe демалыс нысанын салу, сондай-ақ Altay Kompas ЖШС жүзеге асырып жатқан туристік кешен мен ақпараттық орталықтың құрылысы жүргізілуде. Сонымен қатар, «Скай Тау Риддер» жобасы аясында тау шаңғысы кешені мен қонақүйдің негізгі ғимараты қайта жөнделеді. Кейінгі кезеңдерде премиум санаттағы туристік нысандар салынып, жаңа аспалы жол орнатылады. Бұдан бөлек, мотокросс, эндуро, багги және квадроциклдерге арналған арнайы трассалар салу жоспарланып отыр, – деді қала әкімі.
Оның айтуынша, аталған жобалардың толық іске асуы туристерді қабылдау мүмкіндігін едәуір арттырып, орналастыру орындарының санын 60 бірлікке дейін жеткізуге мүмкіндік береді.
Туризммен қатар қалада құрылыс саласы да қарқынды дамып келеді. Биыл пайдалануға берілген тұрғын үй көлемі өткен жылдың сәйкес кезеңімен салыстырғанда 10,7 пайызға артқан.
Қазіргі уақытта Риддерде 600 орындық жаңа мектептің құрылысы жалғасуда. Білім ордасын шілде айында пайдалануға беру жоспарланған. Сонымен бірге екі мектеп пен екі балабақшаға ағымдағы жөндеу жұмыстарын жүргізу үшін 63 миллион теңге бөлінді. Өткен жылы басталған №14 орта мектепті күрделі жөндеу жұмыстары да жалғасып жатыр.
Әлеуметтік-экономикалық көрсеткіштер де оң динамиканы көрсетуде. Жыл басынан бері бес ай ішінде қалада 722 жаңа жұмыс орны құрылды. Қоғамдық жұмыстарға 100 жұмыссыз азамат тартылып, алты жас маман жастар практикасына жолданды. Сонымен қатар, 60 тұрғын кәсіпкерлік негіздеріне оқытылды. Атаулы әлеуметтік көмек 313 адамға көрсетілген.
Қала басшылығы тұрғындардың өмір сүру сапасын арттыруға да ерекше көңіл бөліп отыр. Биыл Риддерде бір ауысымда 500 адам қабылдайтын жаңа емхана мен 200 орындық стационар пайдалануға берілді. Заманауи медициналық құрал-жабдықтармен қамтылған мекемелердің арқасында тұрғындар компьютерлік томография және ультрадыбыстық зерттеулерден өту үшін облыс орталығына баруға мәжбүр емес.
Ауыл шаруашылығы саласында да өсім байқалады. Биыл сүт өндірісі 1,6 пайызға, жұмыртқа өндірісі 8,4 пайызға артқан. Сонымен қатар ірі қара мал, жылқы, қой-ешкі және құс санының өсуі тіркелді.
Осылайша, Риддерде туризмді дамыту, жаңа жұмыс орындарын ашу, әлеуметтік инфрақұрылымды жаңғырту және халықтың өмір сүру сапасын жақсартуға бағытталған жобалар кешенді түрде жүзеге асырылып жатыр. Бұл жұмыстар алдағы жылдары қаланың экономикалық әлеуетін арттырып, өңірдің туристік тартымдылығын жаңа деңгейге көтеруге мүмкіндік бермек.
