Шемонаиха ауданында Марьин Утес жартасы маңындағы аумақты абаттандыру және туристік демалыс аймағына айналдыру жұмыстары жоспарлануда.
Жобаға арналған жер телімі алдын ала бөлініп қойған, қазіргі уақытта аумақты тазарту және оны жүзеге асыратын мердігер ұйымды анықтау жұмыстары жүргізілуде, деп хабарлайды F16.kz сайты.
Аудан әкімдігінің мәліметінше, бұл аумақта келушілерге қолайлы демалыс инфрақұрылымы жасалады.
– Мұнда демалыс аймағы қалыптастырылады. Туристер үшін орындықтар мен беседкалар орнатылады. Биыл абаттандыру жұмыстарын бастаймыз, ал келесі жылы пирс салу және тоғанды тазарту жоспарымызда бар. Сонымен қатар қонақтарға катамарандар ұсыну мүмкіндігі қарастырылуда, – деді Шемонаиха ауданы әкімінің орынбасары Данияр Жүнісов.
Жобаның мақсаты – өңірдің туристік тартымдылығын арттырып, табиғи нысандарды тиімді пайдалану арқылы демалыс инфрақұрылымын дамыту.
Сонымен қатар әкімдік өкілдері биыл ауданда туристерді тартуға бағытталған ірі мәдени іс-шаралардың бірі – UBA Open Fest жазғы фестивалі өтетінін атап өтті. Оған бес мыңнан астам қонақтың қатысуы жоспарланған.
