Бүгін Өскемен қаласында Д.Серікбаев атындағы Шығыс Қазақстан техникалық университеті базасында алғашқы өңірлік ғылым кеңесі өтті, деп хабарлайды F16.kz тілшісі.
Оның басты мақсаты – ғылым мен қоғам арасындағы байланысты нығайту, Шығыс Қазақстан облысының ғылыми-техникалық әлеуетін арттыру. Кеңес облыс әкімдігі мен техникалық университеттің тікелей ынтымақтастығы аясында құрылды. Қазіргі уақытта өңірде бірқатар ғылыми жобалар жүзеге асырылып жатыр, Шығыс Қазақстан ғалымдарының көптеген әзірлемелері өндірісте қолданылуда. Сондықтан қазіргі таңда ғылыми орта мен өндіріс арасындағы байланысты нығайту аса маңызды, бұл идеялар мен жобалардың жүзеге асуына ықпал етеді.
Сондай-ақ, өңірлік ғылым кеңесіне онлайн форматта ҚР Ғылым және жоғары білім министрі Саясат Нұрбек қатысты.
Кеңес өңірлік сын-тегеуріндер мен міндеттерді ескере отырып, ғылымды дамытудың басым бағыттарын айқындайтын стратегиялық функцияны атқарады, практикалық бағыттағы зерттеу қызметін дамытуға ықпал етеді. Сонымен қатар, кеңес отырыстарында қатысушылар қосымша қаржыландыруды немесе ведомствоаралық келісімді қажет ететін бастамалар, ғылыми жобалар мен бағдарламаларды талқылауға шығара алады.
ШҚО-дағы алғашқы өңірлік ғылым кеңесі аясында Д.Серікбаев атындағы Шығыс Қазақстан техникалық университетінде «Қорғаныш және функционалдық жабындар» атты Жастар ғылыми орталығының ашылуы өтті.
Фото: ШҚО әкімінің баспасөз қызметі
