Қызылорда облысының Шиелі ауданында туып-өскен Талғат Рүстемұлы бірнеше жыл бұрын «Еңбек» бағдарламасы арқылы Шығыс Қазақстанға қоныс аударған.
Қазір Шемонаиха қаласында тұрып жатыр. Жақында жұбайымен бірге шағын дәмхана ашып, кәсіпкерлікке бет бұрды. Оның басты арманы — «Қазақстанда жасалған» деген белгісі бар автокөлік шығару, деп хабарлайды F16.kz тілшісі.
Талғаттың мамандығы — суретші. Дегенмен, жоғары оқу орнын тәмамдағаннан кейін ол біраз жыл әскери қызметте еңбек етіп, оның ішінде «Қазбат» құрамында Ирактағы бітімгерлік миссияға қатысқан. Әскери саптан оралған соң да оның техникаға деген қызығушылығы бәсеңдеген жоқ.
Бала кезінен темірге жақын өскен Талғат қазір нағыз шеберге айналған. Кез келген көліктің сынған бөлшегін металдан қайта жасап, жарамды күйге келтіре алады. Бүгінде ол өзінің шағын гаражында жол талғамайтын көлікті қолдан құрастырып жатыр. Оның басты арманы — толық қазақстандық өндірістен шыққан автокөлік жасап шығару.
Қарапайым ауыл азаматының техникаға деген сүйіспеншілігі мен еңбексүйгіштігі өзгелерге де үлгі.
Талғат Рүстемұлымен толық бейнесұхбатты Telegram-арнамыздан көре аласыздар.
