Қазақстанда жыл басынан бері 26 мыңнан астам сайт бұғатталған. Бұл туралы ішкі істер вице-министрі Таразда өткен криптокриминалмен күрес форумында мәлімдеді, деп хабарлайды F16.kz.
Вице-министр Санжар Әділовтің айтуынша, елде Антифрод орталығы құрылған, күдік тудырған интернет ресурстар мен телефон нөмірлері бұғатталып жатыр. Жыл басынан бері 26 мыңнан астам сайт пен 64 миллион күдікті қоңырау бұғатталған.
Сонымен қатар кейінгі екі жылда Қазақстанда криптовалюта айналымына қатысты мыңнан астам қылмыстық іс тіркелген. Олардың ішінде 60%-ы алаяқтық, 25%-ы криптовалюта айырбастау пункттерінің заңсыз қызметі, 15%-ы цифрлық активтер арқылы қылмыстық табысты заңдастыру. Жалпы келтірілген залал көлемі 8 млрд теңгеден асты, – деді вице-министр.
