Ұлыбританияның Хэрогейт қаласында Institution of Engineering and Technology ұйымдастыруымен өткен беделді UK First Lego League Championship халықаралық роботты техника чемпионатында қазақстандық оқушылар жоғары нәтиже көрсетті, деп хабарлайды F16.kz.
Астаналық оқушылардан жасақталған Қазақстан құрамасы жарыста бірден екі бірдей басты марапатқа ие болды. Атап айтқанда, робот-ойын бағыты бойынша І орынды жеңіп алып, сонымен қатар чемпионаттың «Үздік командасы» атанды.
Халықаралық додаға Ұлыбритания, Бразилия, Франция, Германия және Словакия елдерінен барлығы 68 команда қатысты. Ал Қазақстан құрамасы бұл байрақты бәсекеге Астанада өткен Central Asia First Championship турнирінде сәтті өнер көрсетіп, жолдама жеңіп алған болатын.
Жарыс барысында қатысушылар тек робот-ойынмен шектелмей, өз жобаларын да қорғады. Қазақстандық оқушылар «artifacts.kz» атты еліміздегі археологиялық артефактілердің онлайн базасын ұсынды. Жоба аясында олар идеядан бастап, зерттеу жүргізу, техникалық әзірлеу және профильді ұйымдармен байланыс орнатуға дейінгі толық процесті көрсетті.
Сарапшылар Қазақстан командасының жобасын жоғары бағалап, оның технологиялық тұрғыдан ғана емес, ұлттық мәдени мұраны сақтау ісіне қосқан үлесін де ерекше атап өтті.
