Шығыс Қазақстан облысының делегациясы Шанхай ынтымақтастық ұйымы аясындағы халықаралық оқу семинарына қатысу үшін Қытайдың Қарамай қаласына барды. Іс-шара IT және жасанды интеллект салаларындағы тәжірибе алмасуға бағытталған, деп хабарлайды F16.kz.
Семинарда делегаттар жасанды интеллектіге негізделген шешімдер, технологиялық хабтар мен инновациялық компаниялардың жұмысымен танысады. Оқу бағдарламасы алты күнге жоспарланған, онда қатысушылар цифрлық даму саласындағы үздік тәжірибелерді зерттеп, оларды білім беру, бизнес және мемлекеттік басқару жүйелеріне бейімдеуді мақсат етеді.
Қазақстандық делегация құрамында университет пен колледж басшылары, кәсіпкерлер, IT және креативті индустрия өкілдері бар. Делегацияны бастап барған Самбат Рамазанов бұл семинарды Қазақстанның цифрлық болашағы үшін маңызды қадам деп атады.
Жедел цифрлану дәуірінде білікті кадрлар даярлау – басты басымдықтардың бірі. Бұл — жаңа білім мен тәжірибе алмасуға үлкен мүмкіндік, – деді ол.
Семинар жұмысына Қытай, Ресей, Қырғызстан және Өзбекстан өкілдері де қатысып жатыр. Іс-шара халықаралық ынтымақтастықты нығайтып, электронды үкімет пен цифрлық инфрақұрылымды дамыту жолында маңызды алаңға айналып отыр.
