«Қолжетімді интернет» ұлттық жобасы аясында Шығыс Қазақстанның шалғайда орналасқан және халқының саны аз 30 ауылына спутник интернет қосу жұмысы толық аяқталды, деп хабарлайды F16.kz.
Жаһандық байланысқа қосылған елді мекендер ішінде шекарадағы Марқакөл ауданының Шанағаты, Тарбағатай ауданының Ахметбұлақ, Зайсан ауданының Шүршітсу қатарлы қиыр жайлап, шет қонған ауылдары бар.
Жобаның іске асырылуы шалғайдағы ауыл тұрғындарына жаңа мүмкіндіктер туғызып, заманауи цифрлық қызметтердің игілігін көруге айтарлықтай септігін тигізеді. Спутник интернетке қосылу өңірдің цифрлық инфрақұрылымын дамытуда, халықтың өмір сапасын арттыруда және қала мен ауыл арасындағы цифрлық алшақтықты қысқартуда маңызды қадам болып отыр.
Еліміздің Жасанды интеллект және цифрлық даму министрлігінің АО «Jusan Mobile» компаниясымен әріптестігі аясында, сондай-ақ Шығыс Қазақстан облысы әкімдігінің және цифрландыру және архивтер басқармасының қолдауымен OneWeb спутник терминалдарының 30 жиынтығы орнатылып, қосылды. Терминалдар секундына 50 Мбит-ке дейінгі жылдамдықты қамтамасыз етеді, ал қамту радиусы — 100 метр. Бұл технология өңірдің шалғай және жетуі қиын ауылдарында тұрақты интернет таратуға мүмкіндік берді. Қоғамдық Wi-Fi нүктелері әрбір елді мекенде арнайы белгіленген орындарға орналастырылған. Тұрғындар осы аймаққа келіп, тіркеуден өтіп, Wi-Fi желісіне тегін қосыла алады.
Спутник терминалдар төмендегі елді мекендерде орнатылды:
Алтай ауданы: Восточное, Дородница, Северное, Богатырева, Александровка, Березовка ауылдары;
Зайсан ауданы: Шүршітсу, Қарасай, Қабырғатал, Жіңішкесу ауылдары;
Глубокое ауданы: Веселое, Қарагужиха ауылдары;
Риддер қаласы: Поперечное ауылы;
Самар ауданы: Шұбарқайың ауылы;
Күршім ауданы: Қайнар, Кыстау-Күршім ауылдары;
Марқакөл ауданы: Күнгей-Бөкенбай, Теріскей-Бөкенбай, Балықтыбұлақ, Шанағаты ауылдары;
Катонқарағай ауданы: Мойылды, Ақмарал, Өрнек ауылдары, Рахман қайнары шипажайы;
Үлкен Нарын ауданы: Сенное ауылы;
Ұлан ауданы: Манат ауылы;
Тарбағатай ауданы: Сарыөлең, Ахметбұлақ, Жанаталап ауылдары;
Шемонаиха ауданы: Кандыковка ауылы.
