Биыл жыл басынан бері Шығыс Қазақстан облысында 28 елді мекен интернетке қосылды. Жыл соңына дейін тағы 27 ауылға ғаламтор байланысын тарту көзделген. Бұл туралы облыстың цифрландыру және архивтер басқармасы басшысының міндетін атқарушы Арнұр Cапарғалиев мәлім етті, деп хабарлайды F16.kz.
Басқарма басшысының айтуынша, биылға жоспарланған жұмыстар толық орындалғанда облыс халқының 99 пайызы интернетке қол жеткізеді. Яғни, өңірдің 291 ауылы жаһандық желіге қосылады. Қалған 66 ауылға интернет 2027 жылы кезең-кезеңмен тартылады. Бұл елді мекендер Катонқарағай, Күршім және Марқакөл аудандарының таулы аймақтарында және шекара маңында орналасқандықтан интернет байланысын жүргізуде бірқатар қиындық туындаған.
Өңірде бес ауылдың таратылуына байланысты инфрақұрылымдық жобаларға деген жалпы қажеттілік төмендеді. Қазір облыстағы 357 елді мекеннің 246-сы интернетке қосылған. Бұл аймақ тұрғындарының 97,2 пайызы немесе шамамен 707 мың адам.
Цифрлық даму министрлігі «Қазақтелеком» АҚ-пен бірге «Қолжетімді интернет» ұлттық жобасы аясында әлеуметтік маңызды нысандарды қосу бойынша ірі инвестициялық жобаны жүзеге асыру туралы келісімге қол қойды. Бұл ретте Шығыс Қазақстан облысында 186 нысанды қосу жоспарланған. Оператор жергілікті тексерулерді жүргізіп, кешенді жұмыстарды сатып алуға кірісті.
«Қолжетімді интернет» жобасы бірнеше даму бағытын қамтиды. Олар: оптикалық талшықты желілер негізінде «соңғы шақырым» желілерін салу, бесінші буын мобильді байланысты дамыту, Өскеменде қос мақсатты тіректер орнату және көлік жолы бойымен телекоммуникациялық инфрақұрылымды салу. Бүгінге дейін 22 антенна-матчталық құрылыс орнату жоспарланған. 18 нысан бойынша жобалау-сметалық құжаттама сараптамасынан оң қорытынды алынды, құрылыс туралы өтініштер министрлікке жіберілді. Кейбір нысандарға арналған антенна-матчталық құрылғыларды орнату жобасы республикалық бюджет шығындарын оңтайландыруды ескере отырып, инвестормен бірлесе әзірленіп жатыр. Екі құрылыс сараптама кезеңінде, ал тағы екі ауданға құжаттама жіберілуде, — деді Ануар Сапарғалиев.
