Шығыс Қазақстанда өрт қауіпсіздігі қағидаларын бұзудың 2 мыңнан астам фактісі анықталды, деп хабарлайды F16.kz тілшісі ШҚО Төтенше жағдайлар департаментіне сілтеме жасап.
Өңірлік коммуникациялар қызметінде өткен брифинг барысында ШҚО ТЖД Мемлекеттік өрт бақылау басқармасының мамандары тәуекел дәрежесін бағалау критерийлеріне сәйкес 17 мыңнан астам бақылаудағы нысан есепке алынғанын атап өтті. Оның ішінде 354 нысанға тексеру жүргізіліп, өрт қауіпсіздігі қағидаларын бұзудың 2 179 фактісі анықталды. Басшыларға бұзушылықтарды жою мерзімдері көрсетілген нұсқамалар берілді.
– Жыл сайын 10 желтоқсанға дейін және ағымдағы күнтізбелік жылдың 10 мамырына дейін бақылау және қадағалау органдары уәкілетті органға (құқықтық статистика және арнайы есепке алу саласында) бекітілген жартыжылдық тізімдерді жолдайды, ол жартыжылдық жиынтық тізімді қалыптастырады. ҚР Бас прокуратурасы бұл жиынтық тізімді келесі жылға профилактикалық бақылау жүргізу алдында – жыл сайын 25 желтоқсанға дейін және ағымдағы жылдың 25 мамырына дейін өзінің интернет-ресурсында (www.prokuror.kz) жариялайды, – деп хабарлады ШҚО ТЖД Мемлекеттік өрт бақылау басқармасы бастығының орынбасары, азаматтық қорғаныс полковнигі Болат Тоқтарғалиев.
Белгілі болғандай, тексеру басталғанға дейін кемінде отыз күн бұрын тексеру мерзімдері мен тақырыбы көрсетілген хабарлама жолданады. Тексерулер тексеру парақтарында белгіленген талаптар бойынша жүргізіледі. Ал бұзушылықтар анықталған жағдайда жедел әрекет ету шаралары ретінде нысанның қызметін тоқтату қарастырылады.
Осы ретте, ШҚО ТЖД мамандары нысандарда өрт қауіпсіздігі ережелерін қатаң сақтауға шақырады. Атап айтсақ, түтінді жою жүйелерін, өртті автоматты анықтау және сөндіру қондырғыларын, сондай-ақ адамдарды эвакуациялау басқару және ескерту жүйелерін жарамды күйде ұстау, эвакуациялық жолдардың жай-күйіне, алғашқы өрт сөндіру құралдарының болуына, қызмет көрсетуші персоналдың өрт болған жағдайда іс-қимылдарға үйретілуіне, сонымен бірге нысанның электр қауіпсіздігіне ерекше көңіл бөлу қажет, дейді сала мамандары.
