Елімізде жылыту маусымындағы өрттердің және улы газбен улану жағдайларының алдын алуға бағытталған республикалық профилактикалық айлығы жалғасуда, деп хабарлайды F16.kz тілшісі.
Төтенше жағдайлар министрлігінен хабарлағандай, іс-шараның басты мақсаты – өрттің алдын алу, қауіпсіздік мәдениетін арттыру және тұрғындардың тұрмыста өрт қауіпсіздігі ережелерін сақтауына жауапкершілікпен қарау көзқарасын қалыптастыру.
Еліміздің өзге өңірлеріндегідей Шығыс Қазақстан облысында да профилактикалық рейдтер күшейтілді. Әсіресе, халықтың әлеуметтік тұрғыдан осал топтары тұрып жатқан үйлердің жағдайына ерекше назар аударылуда. Құтқарушылар мен әкімдік өкілдері тұрғындарға пештер мен электр жабдықтарын пайдалану кезінде қауіпсіздік шараларын сақтау қажеттігін еске салуда.
– Бірқатар үйге газдың және жану өнімдерінің қауіпті шоғырлануын анықтайтын датчиктер орнатылды. Жылыту маусымы басталғалы бері мамандар облыс аумағында 20 мыңнан астам үйді аралады. Тексеріспен 21 500 адам қамтылып, әлеуметтік осал отбасылардың үйлеріне 318 датчик орнатылды, – деп жазады ТЖМ-нің баспасөз қызметі.
ТЖМ азаматтарға жылыту маусымында өрт қауіпсіздігі ережелерін қатаң сақтау қажеттігін ескертеді:
- тек жарамды пештер мен электр құралдарын қолданыңыз;
- электр желілерін шамадан тыс жүктемеңіз;
- мұржаларды уақытында күйеден тазартыңыз;
- жылыту жүйелерінің жағдайын үнемі тексеріп отырыңыз;
- балаларды ересектердің қарауынсыз қалдырмаңыз;
- тұтатқыш ретінде жанғыш сұйықтықтарды пайдаланбаңыз.
