Шығыс Қазақстандағы 25 шомылу орнының тек 8-і қауіпсіздік ережелеріне сәйкес жабдықталған. Бұл туралы Өңірлік коммуникациялар қызметінде өткен брифинг барысында белгілі болды, деп хабарлайды F16.kz тілшісі.
Баспасөз мәслихатына қатысқан ШҚО Төтенше жағдайлар департаменті Азаматтық қорғаныс басқармасының бастығы Дәурен Ағажаев өңірде 17 жағажай демалушыларды қабылдауға дайын емес екенін айтты. Олардың ішінде Алтай, Зайсан, Үлкен Нарын аудандарындағы және Риддер қаласындағы коммуналдық жағажайлар, сондай-ақ Самар мен Ұлан аудандарындағы жеке жағажайлар бар.
Облыстық мәслихаттың шешімімен, Шығыс Қазақстанда шомылуға тыйым салынған 74 орын және шағын көлемді кемелермен жүзуге рұқсат етілмеген 29 орын анықталды.
Белгілі болғандай, ШҚО-да 4 стационарлық құтқару бекеті мен 1 мобильді бекет жұмыс істейді. Олар:
- Өскемен қаласындағы «Самал» паркі аумағында;
- Өскемен қаласындағы «Көгілдір көлдер» этно-паркі аумағында;
- Күршім ауданының Күршім ауылында;
- Алтай ауданындағы «Көгілдір бұғаз» аумағында;
- Самар ауданының Новостройка ауылындағы мұнай базасы учаскесінде (мобильді бекет) орналасқан.
Бүгінде ШҚО ТЖД, Полиция департаменті мен жергілікті атқарушы органдар мамандарының, сондай-ақ еріктілердің күшімен су айдындарына күнделікті патрульдеу ұйымдастырылады. Патрульдеу барысында балықшылармен және демалушылармен түсіндіру жұмыстары жүргізіледі. Жалпы, шомылу маусымы басталғалы облыста 1 мыңнан астам рейдтік іс-шара өткізілген.
– Су айдындарында қауіпсіздік шараларын бұзған 32 адам ҚР «Әкімшілік құқық бұзушылық туралы» Кодексінің 412-бабы бойынша әкімшілік жауапкершілікке тартылды. Бес адам балаларын қараусыз қалдырғаны үшін айыппұл арқалады, – деді Д.Ағажаев.
Осындай жұмысқа қарамастан, шомылу маусымы басынан бері облыста 4 адам суға кеткен, оның 2-і жасөспірім. Тағы 13 адам (6-ы бала) құтқарылғанын айту керек.
