Чилилік саяхатшы Диего Гальегос бүгін Катонқарағайдағы халықаралық фестивальдің қонағы атанып отыр. Әлемнің талай елін аралаған саяхатшы Қазақстанға алғаш рет келіп, Алтайдың табиғатына тәнті болғанын жасырмады, деп хабарлайды F16.kz тілшісі.
«Бұл жердің табиғаты Патагонияға өте ұқсайды. Өсімдіктері мен жануарлар дүниесі де бір-біріне жақын», – дейді ол.
Диегоны әсіресе Катонқарағайдың ормандары, жануарлары мен табиғи ландшафты таңғалдырған. Оның айтуынша, қазақ жерінің тағы бір ерекшелігі – адамдардың қонақжайлығы мен мейірімділігі.
«Мұндағы адамдар өте жақсы әрі ашық. Маған жергілікті тағамдар да ұнады, әсіресе табиғи қызанақтардың дәмі ерекше екен», – дейді чилилік қонақ.
Өзін бэкпекер-саяхатшы деп таныстырған Диего Ресей арқылы Қазақстанға келген. Ол осы сапарында алғаш рет Абай Құнанбайұлының шығармашылығымен танысып, ұлы ойшылдың еңбектерін оқи бастағанын айтты.
«Қазақстан – мен үшін үлкен жаңалық әрі тосын сый болды. Мен бұл елдің музыкасы, мәдениеті мен спорты туралы бұрын көп білмейтінмін. Қазір соның бәрін осында жүріп танып жатырмын», – дейді ол.
Ал чилилік саяхатшыны ерекше әсерге бөлеген дүниенің бірі – қазақтың ат спорты.
«Менің ойымша, ат спорты – Қазақстанның ең керемет құндылықтарының бірі», – дейді Диего.
Алтай төріндегі фестиваль шетелдік қонақтарға қазақ мәдениеті мен табиғатын таныстырып қана қоймай, Қазақстан туралы жаңа әсер мен жаңа естеліктер сыйлап жатыр.
