ШҚО-да «Қарасора-2025» жедел профилактикалық шарасы аясында 20 келіден астам есірткі тәркіленді, деп хабарлайды F16.kz тілшісі.
Шығыс Қазақстан облысының аумағында 1 маусым мен 31 қазан аралығында өткізілетін «Қарасора-2025» жедел-профилактикалық іс-шарасы аясында есірткіге қатысты 41 құқықбұзушылық анықталды. Тәртіп сақшылары 20 келіден астам түрлі есірткі заттарын тәркілеп, есірткіні «жасырын сату» арқылы таратумен айналысқан адамдарды құрықтады. Бұл туралы Өңірлік коммуникациялар қызметінің алаңында өткен брифинг барысында Есірткі қылмыстарына қарсы іс-қимыл басқармасының бастығы Дәулет Жұмаділов мәлім етті.
Тәркіленген заттардың ішінде «мефедрон» мен «альфа-ПВП» секілді психобелсенді заттар бар. Барлық күдікті уақытша ұстау изоляторына қамалып, сотқа дейінгі тергеп-тексеру амалдары басталды. Сонымен қатар, полицейлер тыйым салынған өсімдіктерді өсіруге арналған 4 фитолабораторияны анықтап жойды.
Есірткі қылмыстарымен күрес тек жедел шаралармен шектелмейді. ҚР Ішкі істер министрі жариялаған «Профилактика жылы» аясында облыс көлемінде нашақорлықтың алдын алуға бағытталған және 71 мыңнан астам адамды қамтыған 300-ден аса іс-шара өткізілді.
Халықаралық нашақорлықпен күрес күніне орайластырылған айлық шеңберінде 48 профилактикалық іс-шара ұйымдастырылды. Олардың қатарында Олимпиада жүлдегерлерінің қатысуымен өткен «Чемпиондық рух» атты таңғы жаттығу, балалар лагерьлерінде жағажай волейболы, футбол, баскетбол мен үстел теннисінен ұйымдастырылған жарыстар бар.
Сонымен қатар, аула клубтарында балалар арасында есірткіге қарсы сурет байқауы өткізіліп, жеңімпаздар Полиция департаменті атынан бағалы сыйлықтармен марапатталды.
Айта кету керек, 26 маусым – Халықаралық нашақорлықпен күрес күніне орай облыс бойынша 10 мыңнан астам адамды қамтыған кең ауқымды профилактикалық іс-шаралар өтті. Бұл күні флешмоб, байкерлер мотошеруі, би байқауы, спорттық жарыстар мен Арбат алаңында эстрада жұлдыздары қатысқан концерт ұйымдастырылды.
