Астанада киберспорттан GL Astana 2026 халықаралық турнирі өтеді. Counter-Strike 2 бойынша ұйымдастырылатын додаға әлемнің үздік 16 командасы қатысып, миллиондаған жанкүйердің назарын өзіне аудармақ.
Жарыс алдағы 15-17 мамыр күндері Barys Arena алаңында өтеді. Үш күнге созылатын турнирде халықаралық деңгейдегі командалар өзара мықтыны анықтайды.
Айта кетейік, 2025 жылы өткен турнир үлкен табысқа жеткен болатын. Жарысты онлайн тамашалаған адамдар саны рекордтық деңгейге жетіп, әлемдік аудитория тарапынан жоғары қызығушылық тудырды. Осы жетістіктің нәтижесінде Астана киберспорттың жаңа орталықтарының бірі ретінде өз орнын нығайтты. Биылғы турнирдің елордада қайта өткізілуі сондықтан.
Турнирдің ұйымдастырушысы — PGL Esports SRL. Компания әлемдегі ірі киберспорт жарыстарын өткізуімен танымал.
Биылғы доданың жүлде қоры айтарлықтай ұлғайып, 1,6 миллион АҚШ долларына жетті. Бұл көрсеткіш турнирді Counter-Strike Major деңгейіндегі жарыстардан да жоғары жүлде қоры бар ірі бәсекелердің қатарына қосады.
Сарапшылардың пікірінше, мұндай ауқымды турнирлер Қазақстанның халықаралық имиджін арттырып қана қоймай, елдегі киберспорт индустриясының дамуына да серпін береді.
