Алтай ауданында «Таза Қазақстан» экологиялық бағдарламасы аясында сенбілік өтіп, көшеттер егілді. Оған, жастар, жұмысшылар, еріктілер және тұрғындар қатысты, деп хабарлайды F16.kz.
Қаладағы мәдениет орталығының алдына жиналған табиғат жанашырлары осы жерден топ-топқа бөлініп, алдын ала белгіленген учаскелерге аттанды. Әр топ өз аумағын тазалап, көгалдандыру жұмысына белсене кірісті. Ортақ күш-жігердің арқасында қоғамдық орындар тазаланып, саябақтардың аумағы ретке келтірілді, көшеттер егілді.
Акцияның негізгі мақсаты – аудан аумағын таза әрі жайлы ету ғана емес, экологиялық мәселелерге назар аудару, адамдардың бойында табиғатқа және туған жерге деген жанашырлық мәдениетті қалыптастыру.
Тұрғындар ортақ іске жұмылған кезде ерекше бір бірлік пен жауапкершілік атмосферасы қалыптасады. Сенбілікке қатысып, ауданның экологиялық ахуалын жақсартуға үлес қосқан барша азаматтарға алғыс білдіреміз, – деді Алтай ауданының әкімі Ренат Құрманбаев.
Мұндай іс-шаралар экологиялық мәдениетті қалыптастырып, өскелең ұрпақты табиғатты аялауға үйретеді.
Айта кетейік, Алтай ауданында ел игілігіне айналған «Таза Қазақстан» акциясы ары қарай да жалғаса береді.
