Өскеменнің 21-ші ықшамаудан тұрғындары қала әкіміне көп жылдан бері шешімін таппай жүрген проблемаларын айтты, деп хабарлайды F16.kz.
Жұртты толғандырған мәселенің бірі – көше жолдарының сапасы. Жаңбырлы күні ми батпақ болып езіліп кететін жолмен аяқ алып жүру қиын. Тұрғындар көшеге асфальт төселмесе де қиыршық тас төгіп берсе деген өтініш-тілегін жеткізді.
Келер жылы тағы бір көшенің жолына асфальт жайып береміз. Тұрғындар өзара ақылдасып, бір көшені таңдаңыздар. Ал батпақ жолдарға қиыршық тас төсейміз. Сонымен қатар жаңбыр мен қар суы ағатын арықтарды кеңітіп, жарық тарту, ауызсумен қамту жұмыстаны толық аяқтаймыз. Жолаушылар автобусын жүргіземіз деп әзірге уәде бере алмаймын, болашақта оның да ретін қарастырып көреміз. – деді қала әкімі Алмат Ақышов.
Кездесу барысында шаһар басшысы азаматтардың ұсыныстарын тыңдап, жауапты сала мамандарымен және тұрғындармен бірге өзекті мәселелерді талқылады.
