Шемонаиха ауданына 2029 жылға дейін 130 млрд теңгеге жуық инвестиция тартылмақ. Бұл туралы бүгін аудан тұрғындарымен кездескен Шығыс Қазақстан облысының әкімі Нұрымбет Сақтағанов мәлім етті, деп хабарлайды F16.kz.
Шемонаиха ауданының 2029 жылға дейінгі даму жоспары бойынша 127,3 млрд теңге жеке инвестиция тарту жоспарланған. Жеке инвестиция есебінен былтыр Рулиха ауылында 480 бас ірі қараға арналған тауарлы-сүт фермасы кеңейтілді, Шемонаиха қаласында 154 орындық «Балу» балалар ойын-сауық орталығы салынды және шұжық цехы ашылды. Ал биыл аудан орталығында «Сивер плюс» кәсіпорны 380 млн теңгеге сүт өңдеу өндірісін іске қосса, ұн тарту-құрама жем комбинаты өндірісін ұлғайтты. Шемонаиха ауданының әкіміне ауданды дамыту жоспары бойынша іс-шаралардың сапалы және уақтылы орындалуын қамтамасыз етуді тапсырамын, — деді аймақ басшысы.
ТУРИЗМ САЛАСЫНДА ТӨРТ ІРІ ЖОБА ҚОЛҒА АЛЫНҒАН
Шемонаихада туристерге арналған 22 орын тіркелген. Биыл ауданда туризм саласында жалпы құны 68 млн теңге болатын төрт жоба іске асырылып жатыр. Аймақ басшысы аудан әкіміне визит-орталық ашу бойынша ұсыныстар енгізуді, «ҚазАвтоЖол» ҰК» АҚ облыстық филиалымен бірлесіп, республикалық жолдың бойында санитарлық-гигиеналық тораптар орнатуды қамтамасыз етуді тапсырды.
ЖЫЛ БАСЫНАН БЕРІ 3 МЫҢ ТОННА ЕТ ӨНДІРДІ
Ауданда мал шаруашылығы да дамып келеді. Бүгінде 20 мың бас ірі қара, 12 мың бас қой мен ешкі, 3 мың жылқы бар. Осы жылдың 10 айында шаруашылықтар 3 мың тонна ет өндірді. Жалпы аудан аумағында 10 тауарлы-сүт фермасы және 1,9 мың басқа арналған 2 мал бордақылау алаңы жұмыс істеп тұр.
Облыс әкімі аудан басшысына жауапты басқармамен бірлесіп, ауыл шаруашылығы өнімдерін өндірудің жаңа жобалары бойынша, оның ішінде «Ауыл аманаты» жобасы аясында ұсыныстар енгізуді тапсырды.
