ШҚО Төтенше жағдайлар департаменті өрт қаупі жоғары маусым басталғалы өңірде бірқатар табиғи өрт болғанын мәлім етті. Осы уақыт ішінде 27 орман өрті анықталып, жалпы 203 гектардан астам аумақ жанып кеткен, деп хабарлайды F16.kz.
Сондай-ақ өрт қаупі жоғары кезеңде 39 дала өрті болып, соның салдарынан 469 гектар аумақ күлге айналған.
Орман алқаптарындағы 27 өрттің 24-і найзағай салдарынан тұтанса, біреуі тұрғындардың немқұрайлы әрекетінен болған. Сондай-ақ жануарлар себеп болған өрт оқиғалары да кездеседі.
Өрттің алдын алу және бақылауды күшейту мақсатында азаматтық қорғау қызметі, полиция, орман шаруашылығы және жергілікті билік өкілдерінен құралған 52 мобильді топ жұмыс істеді. Барлығы 290 қызметкер 1800-ден астам рейд жүргізіп, нәтижесінде 88 азаматқа әкімшілік шара қолданылды. Түсіндіру жұмыстары да кең көлемде атқарылып, түрлі жиындар, дөңгелек үстелдер мен нұсқамалар арқылы 14 мыңға жуық адам қамтылды, — деді ШҚО ТЖД мемлекеттік өрт бақылау басқармасының бастығы Нұржан Өміржанов.
Сонымен бірге өңірде «Өрт – 2025» республикалық командалық-штабтық оқу-жаттығуы ұйымдастырылды. Облыс аумағында өткен 12 тактикалық жаттығуға 800-ден астам маман, 300-ден көп техника және бір өрт пойызы қатыстырылды.
Өрттің кең жайылуын болдырмау үшін ұзындығы 2 мың шақырымнан асатын минералданған жолақтар жасалып, маусым барысында бұл жұмыс толық көлемде орындалған.
Елді мекендердің қауіпсіздігін күшейту үшін жергілікті әкімдіктер 57 өрт бекетін ашып, қосымша 9 ерікті топ құрған.
