Катонқарағай ауданының Аққайнар ауылының «Қазпошта» АҚ-ның бөлімшесі қайта жанданып, жергілікті халыққа қызмет көрсете бастады, деп хабарлайды F16.kz.
Бұл елді мекендегі пошта бөлімшесінің жұмысы экономикалық себептерге байланысты 9 ай бұрын тоқтап қалған. Енді міне қайта жалғасты.
Бөлімшенің ашылу рәсіміне «Қазпоштаның» аудандық пошта байланысы торабының басшысы Жайнагүл Сапенқызы, ауыл әкімдігінің өкілдері және тұрғындар қатысты. Жиында сөз алған округ әкімі Ернұр Қалиқанов қайта жанданған бөлімшенің ашылуы ауыл өміріндегі маңызды қадам екенін атап өтті.
Жайнагүл Сапенқызының айтуынша, ауылдық пошта байланысының пункті тұрғындарға ең қажет қызметтерді бір жерден алуға мүмкіндік береді. Енді Аққайнарда хат-хабар мен сәлемдемелерді қабылдау және жеткізу, коммуналдық төлемдер мен салық төлеу, зейнетақы және жәрдемақы беру, банк қызметтері (несие төлеу, аударымдар), газет-журналға жазылу сияқты қызметтерге халық қол жеткізе алады. Бұл – уақыт үнемдеу, аудан орталығындағы пошта бөліміне бармай-ақ тұрмыстық қажеттіліктерді жергілікті жерде шешуге мүмкіндік.
Осыған дейін пошта қызметі үшін Катонқарағай ауылына баруға тура келетін. Енді барлық қызмет өзімізде көрсетіледі. Бұл – халыққа жасалған жағдай, – деді ауыл тұрғындары.
Аққайнар ауылдық округіндегі пошта бөлімшесі заманға сай материалдық-техникалық құрал-жабдықтармен қамтамасыз етілген, интернет желісіне қосылған. Бөлімшені Өрік Абельгасенова басқарады. Оның пошта байланысы қызметінде еңбек етіп келе жатқанына 10 жылдан асты.
Жұмысы жанданған пошта бөлімшесі ауыл тұрғындарының күнделікті қажеттілігін жеңілдетіп қана қоймай, инфрақұрылымның дамуына, халықтың цифрлық және қаржылық қызметтерге қол жеткізуіне септігін тигізеді, – деді Өрік Бақытқызы.
Бүгінде «Қазпошта» АҚ-ның ауданда тоғыз бөлімшесі жұмыс істеп тұр. Онда барлығы 65 адам еңбек етеді.
Серік Абай
