Шығыс Қазақстан облысында эпизоотиялық ахуал тұрақты. Өңір аумағында аса қауіпті жұқпалы аурулардың ошақтары тіркелген жоқ. Бұл туралы ШҚО ветеринария басқармасының басшысы Рамиль Сағандыков өңірлік коммуникациялар қызметінде өткен баспасөз мәслихатында айтты, деп хабарлайды F16.kz.
Басқарма басшысының айтуынша, өңірдегі эпизоотиялық тұрақтылық жүйелі түрде жүргізіліп жатқан профилактикалық іс-шаралардың, жануарлардың жай-күйін тұрақты бақылаудың және уақтылы ветеринариялық тексеру жүргізудің нәтижесінде қамтамасыз етілді. Биыл облыста ветеринариялық мақсатқа 2,04 млрд теңге қарастырылған.
Сондай-ақ соңғы 12 жылда алғаш рет ветеринариялық қызметтің автопаркі жаңартылды. Облысқа 133 арнайы көлік жеткізіліп, бұл ветеринар мамандарының мобильділігін арттырып, ықтимал қауіп-қатерлерге жедел әрекет етуге мүмкіндік берді.
Саладағы маңызды қадамдардың бірі – заманауи жабдықтармен қамтамасыз етілген, халықаралық стандарттар бойынша аккредиттелген көпсалалы ауыл шаруашылығы зертханасының ашылуы. Жаңа зертхана ветеринариялық диагностика мүмкіндіктерін кеңейтіп, Шығыс Қазақстан облысының экспорттық әлеуетін арттыруға ықпал етеді, — деді Равиль Сағандықов.
Сонымен қатар ветеринариялық инфрақұрылымды жаңғырту мәселесі өзектілігін сақтап отыр. Осыған байланысты 2026–2027 жылдарға арналған жалпы құны 3,6 млрд теңге болатын бюджеттік бағдарлама әзірленген. Аталған бағдарлама аясында аудандық ветеринариялық станциялар, ветеринариялық пункттер және мал қорымдарын салу жоспарланып отыр.
Рамиль Сағандыковтың айтуынша, бұл шараларды жүзеге асыру эпизоотиялық тәуекелдерді одан әрі азайтып, жануар тектес өнімдердің қауіпсіздігін қамтамасыз етуге және өңір тұрғындарының денсаулығын қорғауға мүмкіндік береді.
