Облыс орталығында жылыту маусымы аяқталды. Қаланың негізгі энергия көзі саналатын «Өскемен жылу—электр орталығында» (ЖЭО) жоспарлы жөндеу жұмысы басталды, деп хабарлайды F16.kz порталы кәсіпорынның баспасөз қызметіне сілтеме жасап.
2025-2026 жылдардағы жылыту маусымы 203 тәулікке созылды және ол қалыпты жағдайда өтті. Ешқандай форс-мажор болған жоқ. Осы уақыт ішінде «Өскемен ЖЭО» тұрғын үйлерді, әлеуметтік нысандарды, кәсіпорындар мен бизнес субъектілерін жылумен және электр қуатымен тұрақты қамтамасыз етті. Маусым соңында өндірілген жылу энергиясының көлемі 2,15 млн Гкал болды.
Жылыту кезеңі аяқталысымен станцияда келер қысқа дайындық басталып кетті. Ол қазанға дейін жалғасады. Барлығы 17 негізгі жабдыққа жөндеу жүргізілмек. Бұл мақсатқа биыл 15 млрд теңгеден астам қаржы бөлінеді.
Станцияда қуаттылықты арттыратын ірі инвестициялық жоба жүзеге асырылып жатқанын айта кету керек. Жобада №13 турбоагрегат пен №16 қазандық агрегатын салу көзделген. Нәтижесінде жылу тапшылығы азайып, энергиямен қамту тұрақтылығы артады.
Бұдан бөлек, жылу орталығында озық технологияларды енгізу арқылы қоршаған ортаға эмиссияларды азайту, АТҚ-2 құрылғысын кезең-кезеңімен жаңғырту (2026–2029 жылдар), жерасты өнеркәсіптік су құбырларын күрделі жөндеу (2028 жылға дейін), бас корпусты қайта жаңарту (2027 жылға дейін) жүргізіліп жатыр.
Айта кетейік, «Өскемен ЖЭО» – Шығыс Қазақстан облысындағы жылу және электр энергиясын өндіретін ең ірі кәсіпорындардың бірі. Кәсіпорын 2017 жылдан бері «Қазақстан коммуналдық жүйелері» компаниялар тобының құрамында жұмыс істейді. Станцияның белгіленген жылу қуаты – 859,9 Гкал/сағ, ал электр қуаты – 372,5 МВт. Мұнда өнімділігі сағатына 75-тен 500 тоннаға дейін жететін тоғыз қазандық агрегаты және қуаты 4-тен 120 МВт-қа дейінгі сегіз турбоагрегат орнатылған.
Жалпы, жүргізіліп жатқан жаңғырту және кеңейту жұмыстары алдағы жылыту маусымын тұрақты өткізуге және өңірдің энергетикалық қауіпсіздігін күшейтуге мүмкіндік береді.
