Астанада Ұлттық волонтерлік желі «Жаңа Конституция жобасын талқылау және қолдау» атты дөңгелек үстел ұйымдастырды. Іс-шараға еліміздің барлық өңірінен волонтерлік ұйымдардың өкілдері, өңірлік фронт-офистер мен бастамашыл топтар, сондай-ақ серіктестер онлайн және офлайн форматта қатысты.
Кездесу барысында волонтерлік сектордың жаңа Конституцияны талқылаудағы рөлі, үкіметтік емес ұйымдардың халықты ақпараттандырудағы қызметі, қоғамдық диалогты дамыту және мемлекеттік органдармен ынтымақтастық мәселелері қаралды.
Қазақстан Республикасы Парламенті Мәжілісінің депутаты, Конституциялық реформа жөніндегі комиссия мүшесі, «Ұлттық волонтерлік желі» ЗТБ төрағасы Вера Ким азаматтық қоғамның қатысуының маңызын атап өтті:
Конституция қоғаммен диалог негізінде әзірленіп жатыр. Жаңа жобамен алты ай жұмыс барысында шамамен 4 мың ұсыныс түсті. Бұл қоғамның енді пассивті бақылаушы емес, саяси үдерістердің толыққанды қатысушысына айналғанын көрсетеді, — деді ол.
Ол сондай-ақ жаңа конституциялық институт – Халық кеңесінің – қоғамдық қатысуды нығайтудағы маңызына тоқталды.
Бұл мемлекет пен қоғамның стратегиялық даму бағыттарын бірлесіп талқылайтын моделі. Қоғам тек талқылаумен шектелмей, заң шығару процесіне ресми бастама енгізе алады, — деді депутат.
Конституциялық реформа жөніндегі комиссия мүшесі, «Ассамблея жастары» РҚБ төрағасы Тимур Джумурбаев Қазақстан жастары үшін жаңа Конституцияның маңызын атап өтті.
Жаңа Конституция бүгінгі және болашақ ұрпаққа бағытталған. Адамға бағдарлану – жастардың әділ әрі қолжетімді өсуіне, даму мүмкіндіктерін кеңейтуге мүмкіндік береді, — деді қоғамдық бірлестік төрағасы.
Ол жастардың өзін-өзі дамытуы, білім мен инновация, адами капиталды арттыру арқылы елдің дамуына қосатын үлесін ерекше атады.
«Медициналық жастар» РҚБ төрағасы, медицина саласының волонтері Әбдіраш Абылайхан Конституция жобасының әлеуметтік және медициналық аспектілерін тілге тиек етті.
Жоба адам өмірі мен денсаулығын мемлекеттік саясаттың ортасына қояды. Отбасыны, ана мен баланы қорғау, денсаулық сақтау құқығын бекіту – жүйелі әрі құқықтық негіз береді, — деді волонтер Әбдіраш Абылайхан.
Оның айтуынша, жобаның тиімділігі оның нақты бағдарламалармен, қаржыландырумен және жас мамандар үшін қолайлы еңбек жағдайымен қамтамасыз етілуіне байланысты.
Дөңгелек үстел ашық талқылау және пікір алмасу форматында өтті. Шара қорытындысында Ұлттық волонтерлік желі жаңа Конституция жобасын қолдау жөнінде үндеу жариялады.
