Өскемен іргесіндегі Шешек асуында құсбегіліктен қаланың ашық чемпионаты өтті. Дүбірлі бәсекеге Шығыс Қазақстан облысының әр түкпірінен кәсіби бүркітшілер қатысты, ден хабарлайды F16.kz.
Облыстың Құрметті азаматы, ұлттық спорттың жанашыры болған Ержан Сқақовты еске алуға арналған біріншілікте Күршім, Зайсан, Ұлан аудандарынан, Өскемен қаласынан келген барлығы 20 құсбегі бақ сынады.
Құсбегілік дәстүрі кейінгі бес-алты жылда Шығыс өңірінде қарқынды дамып келеді. Соның бір дәлелі ретінде былтыр күзде Ұлан ауданының Бозанбай ауылында жеті мемлекет өкілдерінің қатысуымен дүркіреп өткен дүбірлі халықаралық бүркітшілер фестивалін айтуға болады. Бүгінгі чемпионат алдағы 15 наурызда тәуелсіздігіміздің алтын тұғыры болған Ата заңымыз қабылданатын референдумды қолдау мақсатында ұйымдастырылып отыр, – деді құсбегі Нұртай Тілеужанұлы.
Алтайдың сақылдаған сары аязына қарамай Шешек тауына жиылып, аспан серісінің өнерін тамашалаған жұртшылық ұлттық дәстүрлі тұнығынан сусындады. Бағзыдан жеткен баба мұрасын бойға сіңіріп, ұлы дала рухын сезінді. Кереге қанат алып құсты қолға қондырып, фотосуретке түсіп жатты жұрт.
Қыран атты құсымен ашық біріншіліктің күміс жүлдесін иеленген Ахмер ауылының тұрғыны Архат Қиялбекұлы жарыстың жоғары деңгейде өтіп жатқанын айтты.
Бүркіт баптағалы 15 жылдан астам. Осы уақыт ішінде текті құстың қыр-сырын, мінезін бір кісідей біліп алдық. Жуықта Орал қаласында өткен ел чемпионатына қатысып, Қыран атты құсыммен жүлделі екінші орынды иелендім. Бүгін міне өзіміздің Өскеменде өтіп жатқан сайысқа қатысып, финалға өттік. Бұйырғанын көреміз енді. Күннің суығына қарамастан жарыс жоғары деңгейде ұйымдастырылды, сайыста бақ сынаған құсбегілердің бәрі нағыз шеберлер, – деді шешуші сайыс алдында бізбен сұхбаттасқан Архат бүркітші.
