Шығыс Қазақстан облысының делегациясы әлемдегі ең ірі туристік көрмелердің бірі – ITB Berlin аясында Германияның жетекші туристік қауымдастықтарының өкілдерімен бірқатар екіжақты B2B-кездесу өткізді. Келіссөздер көрме алаңында ұйымдастырылып, өңірдің туристік әлеуетін Еуропа нарығында ілгерілетуге және тікелей іскерлік байланыстар орнатуға бағытталды.
Кездесулердің бірі Германия туристік индустриясындағы ең ірі кәсіби бірлестіктердің бірі – Deutscher Reiseverband (DRV) өкілдерімен өтті. Сонымен қатар делегация Германиядағы тәуелсіз туристік компанияларды біріктіретін Allianz Selbständiger Reiseunternehmen (ASR) қауымдастығының мүшелерімен де келіссөздер жүргізді. Келіссөздер барысында Шығыс Қазақстан облысының өкілдері өңірдің туристік мүмкіндіктерін таныстырды. Әсіресе, табиғи, аутентті және экологиялық туризм бағыттарын дамытуға, сондай-ақ еуропалық саяхатшыларға арналған арнайы туристік өнімдерді қалыптастыруға ерекше назар аударылды.
Кездесулер барысында қауіпсіздік мәселелерін, көлік логистикасын, сервистік инфрақұрылым деңгейін және өңірдің Еуроодақ елдерінен келетін ұйымдастырылған туристік топтарды қабылдауға дайындығын талқылады. Негізгі мақсат – тұрақты серіктестік байланыстар орнату, Шығыс Қазақстанның бірегей туристік бағыттарын халықаралық нарықта ілгерілету және кірме туризм саласындағы ынтымақтастықты дамыту.
Келіссөздер нәтижесінде Германия туроператорларына Шығыс Қазақстан облысын арнайы таныстыру сапарын (инфотур) ұйымдастыру мүмкіндігі қарастырылды. Мұндай сапар неміс туристік бизнесі өкілдеріне өңірдің табиғи ландшафттарын, орналастыру нысандарын, туристік маршруттарын және әріптестік бағдарламаларды дамыту әлеуетін өз көздерімен көруге мүмкіндік береді.
Сарапшылардың пікірінше, бұл бастама ұзақ мерзімді ынтымақтастық орнатуға және Шығыс Қазақстанның туристік ұсыныстарын еуропалық нарықта кеңінен танытуға негіз болады.
Сонымен қатар көрме аясында маңызды келісімдердің бірі жасалды: Қазақстан Республикасының Туризм және спорт министрлігі мен Deutscher Reiseverband арасында ынтымақтастық туралы меморандумға қол қойылды.
Қол жеткізілген келісімге сәйкес, 2026 жылдың тамыз айында Астана қаласында DRV Destination Forum өткізу жоспарланып отыр. Форум бағдарламасында Қазақстанның туристік әлеуетін таныстыру, неміс туроператорларымен B2B-келіссөздер ұйымдастыру және елдің негізгі туристік бағыттары мен инфрақұрылымымен таныстыру қарастырылған.
Келісімнің негізгі мақсаты – Қазақстан бойынша туристік турларды жетекші неміс туроператорларының каталогтарына енгізу және оларды Германия нарығында белсенді түрде ілгерілету.
Меморандумға қол қою және алдағы форумды өткізу Қазақстанның халықаралық әріптестікті кеңейту, кірме туристік ағындарды әртараптандыру және елдің бәсекеге қабілетті туристік бағыт ретіндегі имиджін нығайту бағытындағы жүйелі жұмысының жалғасы болып саналады.
